Cyswllt Gorllewinol 2 / Western Link 2

Gwybodaeth am Gyswllt Gorllewinol 2

Mae Cyswllt Gorllewinol 2 yn brosiect ar y cyd rhwng National Grid a SP Energy Networks ar gyfer cysylltiad Cerrynt Uniongyrchol Foltedd Uchel (HVDC) newydd yn y môr rhwng Cymru a'r Alban. Bydd y prosiect yn atgyfnerthu'r rhwydwaith trawsyrru gyda cheblau tanddaearol newydd i gysylltu ynni gwynt adnewyddadwy ar y môr a gynhyrchir yn nyfroedd yr Alban â chartrefi a busnesau ledled Cymru a thu hwnt.

Gweld y dudalen hon yn Saesneg

Fersiwn Saesneg

Ein cynigion

Bydd Cyswllt Gorllewinol 2 yn cludo ynni glân o ffynonellau ar y môr ar hyd arfordir gorllewinol yr Alban i orsaf drawsnewid arfaethedig yn Swydd Ayr, sy'n cael ei chyflwyno gan SP Energy Networks.

O'r fan honno, mae National Grid yn bwriadu datblygu cysylltiad cerrynt uniongyrchol foltedd uchel (HVDC) newydd i gludo'r ynni hwn i arfordir Gwynedd. Bydd y llwybr arfaethedig yn mynd drwy ddyfroedd Yr Alban, Gogledd Iwerddon, Ynys Manaw, a Chymru.

Yng Ngogledd Cymru, rydym hefyd yn datblygu cynigion i gysylltu'r cyswllt â'r rhwydwaith trydan cenedlaethol. Byddai hyn yn cynnwys glanfa ar arfordir Gwynedd, cebl tanddaearol, a gorsaf drawsnewid newydd ger is-orsaf bresennol Pentir.

Map dangosol yw hyn, felly nid yw’n adlewyrchu llwybr y ceblau yn fanwl gywir.

Beth fydd yn digwydd nesaf

Mae ein prosiect yn ei cham dylunio cynnar.

Byddwn yn ymgynghori ac yn gweithio gyda thrigolion lleol, eu cynrychiolwyr a rhanddeiliaid statudol - fel awdurdodau lleol - drwy bob cam o'r broses gynllunio. Byddwn yn cynnal ymgynghoriad anstatudol ynghylch ein cynigion yn ystod haf 2026.

Mae ein hymgynghoriadau cyhoeddus wedi'u cynllunio i gyflwyno ein cynigion i gymunedau lleol a derbyn adborth. Mae adborth yn chwarae rhan bwysig yn y broses o ddatblygu ein cynigion, ac mae'n helpu i siapio'r prosiect cyn i ni gyflwyno ein cais cynllunio i Gyngor Gwynedd.

Ein nod yw lliniaru'r effeithiau lle bo modd a sicrhau buddion lleol i gymunedau.

Efallai y byddwch chi hefyd yn ein gweld yn gwneud ychydig o waith arolygu cynnar yn yr ardal. Pwrpas hyn yw i ddeall mwy am y tir a'r amgylchedd lleol wrth i ni ddylunio ein prosiect.

Byddwn yn ymgysylltu â pherchnogion tir a meddianwyr i geisio mynediad er mwyn gynnal yr arolygon.

Bydd canlyniadau'r arolygon a'r asesiadau technegol yn cael eu defnyddio i lywio ein cynigion, a byddwn yn ymgynghori ar ein cynigion yn ystod haf 2026.

Cysylltwch â ni os oes gennych unrhyw gwestiynau am ein gwaith arolygu.

Uwchraddio'r Grid Cenedlaethol yng Nghymru

Mae Cyswllt Gorllewinol 2 yn rhan o’r cynllun i Uwchraddio'r Grid Cenedlaethol.

Cynllun Uwchraddio'r Grid Cenedlaethol yw'r trawsnewidiad mwyaf o'r grid trydan ers cenedlaethau. Mae ein prosiectau seilweithiol ledled Cymru a Lloegr yn helpu i gysylltu mwy o ynni glan a lleol, o ffynonellau mwy fforddiadwy, â'ch cartrefi a'ch busnesau.

Cafodd grid trydan y DU ei adeiladu'n wreiddiol i gysylltu trydan a gynhyrchwyd mewn gorsafoedd pŵer o danwydd ffosil, fel glo o Ogledd a Chanolbarth Lloegr a De Cymru.

Wrth i'r DU symud oddi wrth danwydd ffosil a thuag at gynhyrchu mwy o ynni glân, byddwn ni i gyd yn defnyddio mwy o drydan nag erioed o'r blaen. Disgwylir i'r galw am drydan gynyddu 50% erbyn 2035, a dyblu erbyn 2050, wrth i ni ddatgarboneiddio'r ynni sy'n cael ei ddefnyddio ar gyfer pethau fel gwresogi a thrafnidiaeth.

Er mwyn trawsnewid i ffynonellau ynni diogel, fforddiadwy a glanach, mae angen adeiladu seilwaith newydd, yn ogystal ag uwchraddio’r grid eisoes bresennol, er mwyn cludo’r pŵer o ble y caiff ei gynhyrchu i ble mae ei angen, megis yng nghartrefi a busnesau.