Tîm Chwilio ac Achub De Eryri yn cael cyllid gan y Rhaglen Grantiau Cymunedol i helpu â gweithrediadau achub

Os bydd argyfwng ar fynydd yn rhan ddeheuol Parc Cenedlaethol Eryri, mae’r sefydliad elusennol yn gweithio gyda Heddlu Gogledd Cymru i helpu i ganfod ac achub pobl sydd ar goll, pobl sy’n agored i niwed, pobl sydd wedi’u hanafu neu bobl na all ddal ati. Mae’r tîm yn fach ond maen nhw’n gwasanaethu 800 cilomedr sgwâr o dir gwyllt, garw a phrydferth, syn cynnwys mynyddoedd, rhostir a thir amaethyddol, yn ogystal ag afonydd a llynnoedd.

Dyfarnwyd £16,000 i dîm Chwilio ac Achub De Eryri gan y Rhaglen Grant Cymunedol i brynu cludwely ac olwynion cludwely newydd i helpu gweithrediadau achub ar dir anodd, radios digidol i'w defnyddio wrth ymateb i alwadau a siacedi ysgafn i’r tîm.

Wrth sôn am y grant, dywedodd Siân Evans, swyddog codi arian Tîm Chwilio ac Achub De Eryri:

“Mae’r cyllid wedi caniatáu i ni gael offer newydd hanfodol er mwyn i ni allu parhau i helpu pobl sy’n mynd i beryglon wrth fwynhau ym Mharc Cenedlaethol Eryri .

Rydym ni’n gwasanaethu ardaloedd gwyllt y Parc Cenedlaethol, ac mae llawer o gerddwyr a dringwyr yn ymweld â’r ardaloedd hyn bob blwyddyn. Yn y tirweddau anodd hyn, mae’n hollbwysig ein bod yn gallu ymateb yn gyflym i alwadau argyfwng, a bydd hyn yn llawer haws gyda’r offer newydd rydym ni wedi gallu ei brynu gydag arian y grant.”

Dywedodd Steve Ellison, Uwch Reolwr Prosiect Darpariaeth Effaith Weledol Eryri:

“Bydd y cyllid gan y National Grid yn helpu Tîm Chwilio ac Achub De Eryri i ddal ati i ddarparu gwasanaeth achub bywyd hollbwysig. Bwriad y Rhaglen Grantiau Cymunedol yw cefnogi sefydliadau lleol nid-er-elw, felly mae’n wych gweld y cyllid hwn yn mynd i sefydliad sydd wedi ymrwymo i gadw’r gymuned a'r bobl sy’n ymweld â’r ardal yn ddiogel.”

Mae’r Rhaglen Grantiau Cymunedol wedi ei hanelu at elusennau a mudiadau cymunedol mewn ardaloedd lle mae gweithgareddau adeiladu a gweithredoedd Trosglwyddiad Trydan y National Grid yn effeithio arnynt.

Bydd y cyfnod ymgeisio nesaf ar gyfer y Rhaglen Grantiau Cymunedol yn agor ym mis Ebrill 2026. Mae rhagor o wybodaeth am y meini prawf cymhwysedd a sut mae gwneud cais ar gael ar wefan y National Grid: https://www.nationalgrid.com/community-grant-programme