Y prosiect
Newyddion diweddaraf – Hydref 2026
Erbyn hyn, rydym wedi cael caniatâd cynllunio ar gyfer tair o bedair prif elfen y prosiect hwn.
Mae hyn yn cynnwys caniatâd i:
• Osod ceblau tanddaear, adweithydd siynt newydd a seilwaith arall yn Is-orsaf Trawsfynydd. Mae’r gwaith yno wedi dechrau.
• Gosod ceblau tanddaear o’r newydd a newid hen rai yn Is-orsaf Pentir. Bydd y gwaith yn dechrau yno yn haf 2027.
• Newid ceblau trydan presennol sy'n rhedeg o dan aber afon Glaslyn a chysylltu’r ceblau â safle prosiect Darpariaeth Effaith Weledol Eryri ym Minffordd. Mae’r gwaith paratoi wedi dechrau, a disgwyliwn ddechrau ar y prif waith yng ngwanwyn 2027.
Yn ogystal, rydym yn ceisio caniatâd cynllunio i adeiladu is-orsaf newydd i'r de o Fryncir, oddi ar yr A487. Ar ôl sgyrsiau gydag Asiant Cefnffyrdd Gogledd a Chanolbarth Cymru (NMWTRA) a Chyngor Gwynedd, rydym wedi symud ffordd fynediad y safle tua 275 metr i'r dwyrain ar hyd yr A487 yn ein dyluniad.
Ein bwriad yn awr yw cyflwyno cais cynllunio wedi'i ddiweddaru i Gyngor Gwynedd ym mis Rhagfyr 2026.
Bydd angen i ni newid y gwifrau ar un ochr i'r llinell drydan uwchben rhwng Bryncir a Thrawsfynydd hefyd, fel y gall y rhan hon o'r rhwydwaith gludo mwy o drydan. Disgwyliwn ddechrau’r gwaith hwn ddiwedd haf/ ddechrau hydref 2028.
Ein gwaith yn yr ardal ar hyn o bryd
Cyn y prif waith adeiladu i newid y ceblau tanddaear presennol ym Mhorthmadog ac o dan aber afon Glaslyn, mae angen i ni wneud tipyn o waith paratoi.
Mae'r gwaith paratoi hwn wedi dechrau ac mae'n cynnwys creu compowndiau adeiladu dros dro.
Mae’r compownd cyntaf yr ydym yn ei greu ar yr hen faes ymarfer golff oddi ar yr A498, i'r de o gylchfan Tremadog. Yno y bydd canolfan y gwaith tra byddwn yn creu ein prif gompownd adeiladu ar ochr draw'r ffordd. Mae hyn yn golygu y gallech ein gweld yn cludo offer a deunyddiau yn ôl a blaen i'r safle hwn dros y misoedd nesaf.
Byddwn yn defnyddio'r compownd llai hyd nes y bydd y prif gompownd wedi'i adeiladu, ac yna bydd y prif gompownd yn dal yn ei le tan ddiwedd y prosiect. Bydd y prif gompownd yn cynnwys swyddfeydd staff, cyfleusterau lles, storfa offer a mannau i storio deunyddiau dros dro.
Mae angen i National Grid atgyfnerthu ac adnewyddu rhannau o'r rhwydwaith trydan foltedd uchel presennol yng ngogledd Cymru. Mae'r gwaith hwn yn rhan o ymgyrch Uwchraddio'r Grid – y cynllun mwyaf ers cenedlaethau i adnewyddu'r grid.
Galluogi Cymru i gael dyfodol o ynni glân
Mae angen i National Grid atgyfnerthu ac adnewyddu rhannau o'r rhwydwaith trydan foltedd uchel yng ngogledd Cymru.
Mae dulliau cynhyrchu trydan yn y Deyrnas Unedig yn newid yn gyflym i system ynni lanach, fwy fforddiadwy a chadarnach ar gyfer y dyfodol.
Rhagwelir y bydd y galw am drydan yn dyblu, o leiaf, erbyn 2050 a ninnau'n defnyddio mwy o ynni glân i wresogi ein cartrefi, gyrru cerbydau trydan a phweru ein diwydiant.
Nod Llywodraeth Cymru yw sicrhau bod ynni o ffynonellau adnewyddadwy yn diwallu swm sy'n cyfateb i 70 y cant o'r galw am drydan yng Nghymru erbyn 2030. Yn ogystal, mae Llywodraeth y DU wedi ymrwymo i sicrhau allyriadau nwyon tŷ gwydr sero net erbyn 2050, a'i huchelgais yw cysylltu 50 GW o ynni gwynt a gynhyrchir ar y môr erbyn 2030.
Adeiladwyd rhan fawr o'r system drawsyrru bresennol yn yr 1960au a'i chynllunio i gysylltu trydan wedi'i gynhyrchu'n bennaf mewn gorsafoedd pŵer glo â chartrefi yng Nghymru a Lloegr.
Er mwyn cysylltu ffynonellau newydd o ynni adnewyddadwy â’r rhwydwaith, mae angen i ni atgyfnerthu ac adnewyddu'r rhwydwaith trydan presennol rhwng Pentir a Thrawsfynydd. Bydd hyn yn helpu i gadw'r rhwydwaith yn gadarn trwy sicrhau y gellir cyflenwi mwy o ynni glân i gartrefi a busnesau.
Mae hwn yn brosiect mawr, ac mae'n hanfodol bod y cysylltiad wedi'i atgyfnerthu erbyn 2030.
Mae'n rhan o ymgyrch Uwchraddio'r Grid, sef y cynllun mwyaf ers cenedlaethau i adnewyddu'r grid trydan ac mae'n cynnwys 17 o brosiectau seilwaith mawr ledled Cymru a Lloegr. Symud i gyfeiriad trydan gwyrdd yw'r ffordd fwyaf effeithiol o sicrhau bod ynni'n fforddiadwy, a disgwylir i ynni adnewyddadwy cynhenid helpu i ostwng biliau ynni yn y tymor hir.
Cewch ddarllen mwy am ein gwaith a'n cynlluniau diweddaraf yma.
Cadw mewn cysylltiad â’r gymuned
Rydym yn awyddus i gydweithio’n agos â chymunedau, perchnogion tiroedd, busnesau a chynrychiolwyr etholedig lleol, a chyrff statudol, i helpu i sicrhau bod cyn lleied o anhwylustod ag y bo modd yn ystod y prosiect hanfodol hwn.
Cyn i'r prif waith adeiladu ddechrau yn haf 2027, byddwn yn cyhoeddi cylchlythyr diweddaru a fydd yn rhoi mwy o fanylion am waith y prosiect. Yn ogystal, byddwn yn trefnu digwyddiadau cymunedol, i roi cyfle arall i bobl siarad â ni wyneb yn wyneb, cyfarfod â thîm y prosiect a gofyn cwestiynau.
Daw'r diweddariad hwnnw ar ddechrau ein rhaglen i ymgysylltu'n rheolaidd â'r gymuned, gyda newyddion, sgyrsiau a digwyddiadau trwy gydol y cyfnod adeiladu.
Os oes gennych gwestiynau yn y cyfamser, mae croeso i chi gysylltu â ni gan ddefnyddio’r manylion ar ochr dde’r dudalen hon.
Cysylltu â ni
Os oes gennych gwestiynau am y prosiect, gallwch gysylltu â ni fel hyn:
- Ein ffonio ni ar: 0800 915 2485
- Anfon neges ebost i: [email protected]