Mae angen i National Grid atgyfnerthu ac adnewyddu rhannau o'r rhwydwaith trydan foltedd uchel presennol yng ngogledd Cymru. Mae'r gwaith hwn yn rhan o ymgyrch Uwchraddio'r Grid – y cynllun mwyaf ers cenedlaethau i adnewyddu'r grid.
 

Galluogi Cymru i gael dyfodol o ynni glân

Mae angen i National Grid atgyfnerthu ac adnewyddu rhannau o'r rhwydwaith trydan foltedd uchel yng ngogledd Cymru.

Mae dulliau cynhyrchu trydan yn y Deyrnas Unedig yn newid yn gyflym i system ynni lanach, fwy fforddiadwy a chadarnach ar gyfer y dyfodol.

Rhagwelir y bydd y galw am drydan yn dyblu, o leiaf, erbyn 2050 a ninnau'n defnyddio mwy o ynni glân i wresogi ein cartrefi, gyrru cerbydau trydan a phweru ein diwydiant.

Nod Llywodraeth Cymru yw sicrhau bod ynni o ffynonellau adnewyddadwy yn diwallu swm sy'n cyfateb i 70 y cant o'r galw am drydan yng Nghymru erbyn 2030. Yn ogystal, mae Llywodraeth y DU wedi ymrwymo i sicrhau allyriadau nwyon tŷ gwydr sero net erbyn 2050, a'i huchelgais yw cysylltu 50 GW o ynni gwynt a gynhyrchir ar y môr erbyn 2030.

Adeiladwyd rhan fawr o'r system drawsyrru bresennol yn yr 1960au a'i chynllunio i gysylltu trydan wedi'i gynhyrchu'n bennaf mewn gorsafoedd pŵer glo â chartrefi yng Nghymru a Lloegr.

Er mwyn cysylltu ffynonellau newydd o ynni adnewyddadwy â’r rhwydwaith, mae angen i ni atgyfnerthu ac adnewyddu'r rhwydwaith trydan presennol rhwng Pentir a Thrawsfynydd. Bydd hyn yn helpu i gadw'r rhwydwaith yn gadarn trwy sicrhau y gellir cyflenwi mwy o ynni glân i gartrefi a busnesau.

Mae hwn yn brosiect mawr, ac mae'n hanfodol bod y cysylltiad wedi'i atgyfnerthu erbyn 2030.

Mae'n rhan o ymgyrch Uwchraddio'r Grid, sef y cynllun mwyaf ers cenedlaethau i adnewyddu'r grid trydan ac mae'n cynnwys 17 o brosiectau seilwaith mawr ledled Cymru a Lloegr. Symud i gyfeiriad trydan gwyrdd yw'r ffordd fwyaf effeithiol o sicrhau bod ynni'n fforddiadwy, a disgwylir i ynni adnewyddadwy cynhenid helpu i ostwng biliau ynni yn y tymor hir.

Cewch ddarllen mwy am ein gwaith a'n cynlluniau diweddaraf yma.

Y mathau o ganiatâd y bydd arnom eu hangen 

Mae angen caniatâd cynllunio arnom oddi wrth Gyngor Gwynedd a Pharc Cenedlaethol Eryri ar gyfer gwahanol elfennau o’n prosiect. Yn ogystal, bydd angen cydsyniad yr Adran Diogelwch Ynni a Sero Net (DESNZ) ar gyfer y gwaith.

Ym mis Medi 2025, cynhaliwyd Ymgyngoriadau Cyn-Ymgeisio statudol gennym am 28 diwrnod ar brif elfennau’r prosiect, yn unol â deddfwriaeth Llywodraeth Cymru. Roedd yr ymgyngoriadau hyn yn cynnwys rhoi hysbysiad ffurfiol o’r ymgynghoriad i berchnogion y tiroedd dan sylw a thiroedd cyffiniol, cynghorwyr a chynghorau cymuned lleol, ac ymgyngoreion arbenigol.  

Gwnaethom gais i Gyngor Gwynedd am ganiatâd i adeiladu is-orsaf i'r de o Fryncir; i newid y ceblau sy'n rhedeg o dan Aber Afon Glaslyn a gwneud gwaith arall cysylltiedig; ac i osod ceblau newydd ac offer arall yn Is-orsaf Pentir.  
Mae’n bleser gennym ddweud bod Cyngor Gwynedd wedi cymeradwyo ein cais i osod ceblau tanddaear newydd a newid hen rai yn Is-orsaf Pentir. 

Cewch weld statws y ddau gais arall i Gyngor Gwynedd ar borth cynllunio’r cyngor:  

•    Cais ar gyfer Bryncir 
•    Cais ar gyfer Ceblau Glaslyn

Rydym wedi cyflwyno’r cais i wneud gwaith yn Is-orsaf Trawsfynydd i Barc Cenedlaethol Eryri.

Cewch weld y cais hwn ar borth ar-lein Parc Cenedlaethol Eryri:  

•     Cais ar gyfer Trawsfynydd

Ar hyn o bryd rydym yn disgwyl clywed y penderfyniadau ar geisiadau Bryncir, Glaslyn a Thrawsfynydd yn ystod y misoedd nesaf.  

Bydd arnom angen caniatâd ar wahân ar gyfer rhai agweddau ar ein gwaith oddi wrth yr Ysgrifennydd Gwladol dros Ddiogelwch Ynni a Sero Net (DESNZ). Bydd y broses ymgeisio honno’n digwydd yn nes ymlaen eleni a phan allwn rannu rhagor o wybodaeth am yr amseru byddwn yn rhoi gwybod i bawb.